Disclaimer Heavy Rain Flood In Maharashtra : महाराष्ट्रात अतिवृष्टीने जनावरं-घरं वाहून गेली. मोठा पूर आल्याने शेतकऱ्यांचे हाल झाले आहेत. यावर मुख्यमंत्री देवेंद्र फडणवीस काय म्हणतात, ते आपण सविस्तर जाणून घेऊ या.
CM Devendra Fadnavis On Maharashtra Flood : सप्टेंबर महिन्यात महाराष्ट्रातील अनेक भागात अतिवृष्टीमुळे जनजीवन विस्कळीत झाले आहे. मुसळधार पावसामुळे नद्या आणि ओढे तुडुंब भरून वाहू लागल्या, परिणामी गावोगावी पूरस्थिती निर्माण झाली आणि अनेक कुटुंबांचे घरधन पाण्याखाली गेले. या आपत्तीत मोठ्या प्रमाणावर जीवितहानी झाली असून, अनेक नागरिक अद्याप बेपत्ता आहेत. शेतकऱ्यांना या अतिवृष्टीमुळे मोठा फटका बसला आहे. पिकं पाण्याखाली गळली, उभी पिके नष्ट झाली आणि मातीची धूप झाल्याने शेतजमिनींचे मोठे नुकसान झाले आहे. (CM Devendra Fadnavis On Maharashtra Flood)
ओला दुष्काळ जाहीर करण्याची मागणी होत आहे. पण मॅन्युअलमध्ये ओला दुष्काळ कुठेही नाही. ओला दुष्काळ आतापर्यंत कधी जाहीर झालेला नाही. ज्यावेळी दुष्काळ पडतो, त्यावेळी ज्या सवलती, उपायोजना केल्या जातात. – देवेंद्र फडणवीस, मुख्यमंत्री
राज्यात मुसळधार पाऊस
अतिवृष्टीच्या पार्श्वभूमीवर महाराष्ट्र मंत्रिमंडळाची बैठक पार पडली. यामध्ये राज्यातील शेतकऱ्यांच्या अतिवृष्टीमुळे झालेल्या नुकसानीचा आढावा घेण्यात आला. यावेळी मुख्यमंत्री देवेंद्र फडणवीस यांनी सांगितले की, मागील काही महिन्यांत राज्यात मुसळधार पाऊस झाल्यामुळे सुमारे 60 लाख हेक्टर शेतीवर नुकसान झाल्याचा प्राथमिक अंदाज आहे. फडणवीस म्हणाले की, यापैकी पहिल्या टप्प्यातील नुकसान ऑगस्टपर्यंतच झालेल्या शेतीसाठी राज्य सरकारने 2,215 कोटी रुपयांचा निधी वाटप करण्यास सुरुवात केली आहे. पुढच्या दोन-तीन दिवसांत सर्व शेतकऱ्यांचे नुकसानाचे सविस्तर आकडे राज्य सरकारपर्यंत पोहोचतील. काही ठिकाणी पाणी असण्यामुळे अंदाज घेता आलेला नाही, तर काही ठिकाणी शेतकऱ्यांची जमीन, घरं आणि विहिरी देखील वाहून गेली आहेत.
सर्व मदत दिवाळीपूर्वी थेट शेतकऱ्यांच्या खात्यात
मुख्यमंत्र्यांच्या म्हणण्यानुसार, सर्व प्रकारच्या नुकसानीसंदर्भातील समग्र धोरण तयार करून येत्या आठवड्यात राज्य सरकार घोषणा करणार आहे. त्यांनी शेतकऱ्यांना दिलासा देण्याच्या दृष्टीने आश्वासन दिले की, सर्व मदत दिवाळीपूर्वी थेट शेतकऱ्यांच्या खात्यात जमा होईल. ओला दुष्काळ जाहीर करण्याच्या मागणीबाबत बोलताना फडणवीस म्हणाले की, मॅन्युअलमध्ये ओला दुष्काळाची कल्पना नाही आणि आतापर्यंत कोणत्याही वेळेस ओला दुष्काळ जाहीर झालेला नाही. दुष्काळी परिस्थितीसारखीच सवलती लागू करण्याचा निर्णय राज्य सरकारने घेतला आहे. मुख्यमंत्री म्हणाले, “नुकसानीची आकडेवारी जमा होत आहे. पुढच्या आठवड्यात मी, शिंदे साहेब आणि अजितदादा बसून सर्व बाबींचा आढावा घेऊ आणि योग्य निर्णय घेऊन घोषणा करू.”
जिल्ह्यानुसार नुकसानीची आकडेवारी
राज्यातील विविध जिल्ह्यांमध्ये हेक्टरमध्ये (अंदाजे) झालेल्या नुकसानाची माहिती अशी आहे:
जळगाव: 11,664
नाशिक: 14,035
बुलढाणा: 64,682
छत्रपती संभाजीनगर: 1,66,226
अहिल्यानगर: 5,78,798
बीड: 5,71,100
सोलापूर: 3,51,437
जालना: 3,75,973
अमरावती: 2,673
धाराशिव: 1,81,200
लातूर: 8,805
परभणी: 56,836
वाशिम: 38,541
नागपूर: 1,016
वर्धा: 22,960
चंद्रपूर: 3,630
यवतमाळ: 1,37,568
हिंगोली: 9,500
सांगली: 3,535
पुणे: 273
सातारा: 320
कोणत्या पिकांचे नुकसान?
विदर्भात या अतिवृष्टीत कापूस, भात, सोयाबीन, तूर, मूग, उडीद, मका, ऊस, फळपिके आणि भाजीपाला या पिकांचे मोठे नुकसान झाले आहे. मराठवाड्यात सोयाबीन, तूर, कापूस, ऊस, उडीद, बाजरी, कांदा, फळपिके आणि भाजी पिकांना फटका बसला आहे. पश्चिम महाराष्ट्रात कापूस, ऊस, कांदा, बाजरी, सोयाबीन, मका, तूर, उडीद, फळपिके आणि भाजीपाल्याचे नुकसान झाले आहे. उत्तर महाराष्ट्रात कांदा, कापूस, सोयाबीन, भुईमूग, बाजरी, फळपिके आणि भाजीपाला पिकांवर परिणाम झाला. कोकणात भात, नाचणी आणि भाजीपाल्याचे मोठे नुकसान झाले आहे.
पुरामुळे नागरिकांचे स्थलांतर
या अतिवृष्टीमुळे राज्यभरात सुमारे 41,000 नागरिकांना (अंदाजे) सुरक्षित स्थळी हलवावे लागले. जिल्हेवारी नागरिकांचे स्थलांतर अशी नोंद आहे:
सोलापूर : 13,724
जालना : 8,500
छ. संभाजीनगर : 8,029
धाराशिव : 3,957
अहिल्यानगर : 3,497
बीड : 2,000
नांदेड : 1,020
भरीव मदतीची मागणी
महाराष्ट्रात झालेल्या या अभूतपूर्व पावसामुळे मोठा आर्थिक आणि मानवी फटका बसला आहे. अनेक कुटुंबे आणि शेतकरी या आपत्तीत संकटात सापडले आहेत. काही ठिकाणी नुकसानीचे पंचनामे सुरु आहेत, तर काही ठिकाणी नागरिकांना मदत वितरीत केली जात आहे. मात्र, केलेली मदत अपुरी असल्यामुळे शेतकऱ्यांकडून भरीव मदतीची मागणी केली जात आहे.
महापूरात बाधित शेतकऱ्यांसाठी सरकारचा निर्णय
भीषण महापूरामुळे राज्यातील शेतकऱ्यांचे जीवन विस्कळीत झालंय. या पार्श्वभूमीवर सोलापूरसह मराठवाड्यातील पूरग्रस्त शेतकऱ्यांना मदत देण्यासाठी सरकारने विशेष निर्णय घेतला आहे. मात्र या निर्णयामुळे ऊस उत्पादक शेतकऱ्यांची चिंता वाढली आहे. सरकारने ऊसावर प्रति टन 15 रुपये कपात करण्याचा निर्णय घेतला आहे. यातून पाच रुपये थेट पूरग्रस्त शेतकऱ्यांना दिले जातील, तर उर्वरित दहा रुपये मुख्यमंत्री सहायता निधीत जमा केले जाणार आहेत. या कपातीमुळे ऊस उत्पादकांचे उत्पन्न कमी होणार आहे आणि शेतकऱ्यांना मोठा आर्थिक फटका बसण्याची शक्यता आहे. शेतकऱ्यांच्या दैनंदिन खर्चात वाढ झालेली असताना ही कपात त्यांच्यासाठी मोठी आव्हानात्मक ठरणार आहे.
पुरामुळे जनजीवन उध्वस्त झालंय. शेतकऱ्यांची घरं, विहिरी आणि जनावरे वाहून गेली आहेत, तर पिकं पाण्याखाली बुडाल्याने शेतीवर जबर फटका बसला आहे. अनेक कुटुंबे सुरक्षित स्थळी स्थलांतरित झाली असून, नागरिकांना दैनंदिन गरजा भागवण्यासाठी मदतीची धावपळ सुरु आहे. शेतकरी आर्थिक दृष्ट्या संकटात सापडले आहेत आणि राज्य शासनाकडून त्वरित मदत मिळणे आवश्यक आहे. (CM Devendra Fadnavis On Maharashtra Flood)
